په لغمان ولایت کې هم د ښاري تخلفاتو د مخنیوي هڅې او اقدامات پیل شول
۱۴۴۷/۹/۱
د کور او ښار جوړولو وزارت د محترم مقام د حکم له مخې، له ښاري سرغړونو د مخنیوي او د انکشافي پروژو پر تطبیق د څار محترم عمومي ریاست په همغږۍ، د دغه وزارت د ښاري تخلفاتو د مخنیوي محترم ریاست تخنیکي ټیم لغمان ولایت ته سفر وکړ.
یاد سفر د دې لپاره ترسره شو، چې په نوموړي ولایت کې د دویمو او درېیمو واحدونو د کړنو بهیر، د طرزالعمل او د فعالیتونو د پرمختګ کچه په هر اړخیز ډول وڅارل شي او دقیقه ارزونه ترې وشي.
دغه سفر د حساب ورکولو د اصل د ټینګښت، د نظارت د پیاوړتیا او د اداري شفافیت د تأمین په برخه کې ځانګړی اهمیت لري.
استول شوي پلاوي د لغمان ولایت د کور او ښار جوړولو ریاست سربېره د لغمان ولایت له محترم والي قاري بختیار معاذ او د دغه ولایت له محترم ښاروال مولوي رحمةالله شهامت سره لیدلي او د اړوندو ادارو ترمنځ د همغږۍ د پیاوړتیا په اړه یې خبرې کړې دي.
یاد کاري سفر په لغمان ولایت کې د نظارت د ټینګښت، د کړنو د کیفیت د لوړولو، د بینالاداري همغږۍ د پیاوړتیا او د ښاري خدمتونو د وړاندې کولو د ښه والي په موخه یو اغېزمن ګام بلل کېږي.
د کور او ښار جوړولو وزارت تمه لري، چې د دغه سفر پایلې او لاسته راوړنې به په نوموړي ولایت کې د ښاري سرغړونو د مخنیوي د بهیر د چټکتیا او د ښاري پلانونو د لا ښه او منظم تطبیق لپاره زمینه برابره کړي.
