د سمنګان ولایت په حضرت سلطان ولسوالۍ کې د مهاجرینو ښارګوټی پرانستل شو
۱۴۴۷/۰۸/۲۲
د سمنګان ولایت د حضرت سلطان ولسوالۍ اړوند د یکه توت په کلي کې د مهاجرینو ښارګوټی پرانستل شو.
یاد ښارګوټی د کور او ښار جوړولو وزارت د تخنیکي ټیم له لوري د ۲۱۱۳ جریبه ځمکې په ساحه کې طرحه او منظور شوی، چې شاوخوا ۲۲۰۰ استوګنیزې نمرې، ښوونیز مراکز، روغتیايي، مذهبي او سوداګریزمراکز پکې شامل دي.
د ښارګوټي د پرانیستې په مراسمو کې د سمنګان والي الحاج داملا محمد شعیب رسالت، د دایمي اسکان کمېټې غړو، د امارتي ادارو مسؤلینو، د حضرت سلطان ولسوالۍ ولسوال او د مهاجرینو استازو ګډون کړی و.
د غونډې په ترڅ کې د سمنګان والي وویل، چې د کور او ښار جوړولو وزارت په تخنیکي همکارۍ او د اړوندو ادارو په همغږۍ د راستنېدونکو مهاجرینو د عاجلو اړتیاوو د پوره کولو او د باعزته ژوند د زمینې برابرولو لپاره پر دوامداره هڅو بوخت دی، نوموړي زیاته کړه، چې د مهاجرینو ښارګوټي د استوګنیزو نمراتو د وېش بهیر به د مسوولو کمېټو تر څار لاندې، د کور او ښار جوړولو وزارت د اصولو له مخې، د قرعه کشۍ له لارې او په بشپړ شفافیت سره ترسره شي.
