شیخ حمدالله نعماني جوزجان کې د مهاجرینو ښارګوټي لپاره پلان ویزه کړ

۱۴۴۶/۰۸/۱۷
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د جوزجان ولایت درزاب ولسوالۍ کې د مهاجرینو ښارګوټي جوړولو په موخه ترتیب شوی پلان ویزه (تائید) کړ.
د کور او ښار جوړولو وزارت د عملیاتي چارو کمېټې محترم مشر حافظ انجنیر محمد یوسف لطیف وایي، د اجباري راستنېدونکو اړمنو کورنیو لپاره د ښارګوټو د تفصیلي پلانونو جوړولو په لړ کې یې دا ځل جوزجان کې د مهاجرینو لپاره د ښارګوټي جوړولو په موخه تفصیلي پلان ترتیب او ویزه شو.       
دغه پلان په دوه زره (2000) جریبه ځمکه کې جوړ شو چې، یو زر، پنځه سوه او نهه اتیا (1589) استوګنیزې نمرې لري او د ژوند کولو نورې اسانتیاوې هم په کې په پام کې نیول شوي دي.
ښاغلی انجنیر لطیف وایي، د کور او ښار جوړولو وزارت د عملیاتو چارو کمېټې ټول غړي ژمن دي چې، ورسپارل شوې دندې په خپل وخت او ښه کیفیت او معیار سرته ورسوي، تر څو هېوادوالو ته ارزښتمن خدمات وړاندې شي.