د هلمند ولایت د نهر سراج ولسوالۍ به په څلور ورځو کې سروې شي
۱۴۴۵/۱۰/۰۸
د کور او ښار جوړولو وزارت هڅې پیل کړي چې د هېواد په کچه ټولو ولایتونو او ولسوالیو کې د غیر پلانې ودې او پراختیا مخنیوی وکړي او ښاري نظم رامنځته کړي.
همدې موخې ته د رسېدو په پار د کور او ښار جوړولو وزارت د هېواد په کچه ټولو ښارونو، ولسوالیو او د اړتیا وړ ځایونو ته بېلا بېل پلانونه جوړوي.
د پلانونو جوړولو په لړ کې دا ځل په پام کې ده چې د هلمند ولایت د نهر سراج ولسوالۍ لپاره تفصیلي پلان جوړ شي.
هلمند کې د کور او ښار جوړولو محترم رئیس مولوي نېک محمد وایي، د نهر سراج ولسوالۍ د تفصیلي پلان جوړولو لپاره به د توپوګرافي سروې چارې په څلورو ورځو کې سرته ورسوي.
نوموړی وایي، د سروې تخنيکي ټیم یې د نهر سراج ولسوالۍ لپاره توپوګرافي سروې پیل او ټاکل شوې چې راتلونکې شنبې ورځ به یې پای ته ورسوي.
د توپوګرافې سروې د چارو تر بشپړېدا وروسته به د وروستیو کړنو په موخه د مهندسۍ او انجنيرۍ آمریت ته د پلان جوړولو لپاره وړاندې شي.
ټاکل شوې چې روان کال به د هلمند ولايت دکور او ښار جوړولو محترم ریاست د خپل کاري کلني پلان له مخې د دغه ولایت د څلورو ولسواليو لپاره ماسټر پلان او تفصيلي پلانونه جوړ کړي.
