د ملي اقتصاد پیاوړتیا په موخه د اوسپنې ویلې کولو له سکتور څخه د ملاتړ برنامه ترسره شوه

۱۴۴۴/۰۳/۲۲ د ملي اقتصاد پیاوړتیا په موخه د اوسپنې ویلې کولو له سکتور څخه د ملاتړ برنامه په کابل کې د ا.ا.ا د ریاسة الوزرا محترم اقتصادي مرستیال ملا عبدالغني برادر، د کور او ښار جوړولو وزارت محترم سرپرست مولوي حمدالله نعماني، د یو شمېر نورو وزارتونو د سرپرستانو او د اوسپنې ویلې کولو بېلا بېلو فابريکو مسؤلینو په شتون کې د ملي سټنډرډ ادارې (انسا) لخوا ترسره شوه. د نورو ویناوالو تر څنګ په دغه برنامه کې د کور او ښار جوړولو وزارت سرپرست محترم مولوي حمدالله نعماني یاده برنامه مهمه وګڼله او د داخلي تولیداتو پر معیاري کېدو او کیفیت یې ټینګار وکړ. محترم مولوي حمدالله نعماني یادونه وکړه چې د افغانستان بېلا بېلې برخې او ولایتونه د جغرافیې او هوا حالاتو له امله توپیر لري او نه شي کېدای چې د یو بل ملک لپاره جوړ شوي مواد د افغانستان د جغرافیې او هوا حالاتو سره جوړښت وکړي، چې په وینا یې لازمه ده د افغانستان جغرافیوي او هوا حالاتو ته په کتو لازم ساختماني تولیدات تولید شي. ښاغلي نعماني د خپلو خبرو په دوام وویل، په تولیداتو کې د کیفیت او معیار په پام کې نیول د ملي اقتصاد په پیاوړتیا کې مهم رول لوبوي او کولی شي چې د ولس باور ترلاسه کړي. نوموړي صنعت کارانو، پانګوالو او سوداګرو ته په خطاب کې وویل، تر ټولو مهم د سټنډرډ اداره، پولیس او استخبارات د هر مسلمان ایمان او وجدان دی چې له خپل هېواد سره د هغې له مخې چلند وکړي.