کابل ښار کې د لوړو ودانیو په لاندې پوړ کې د موټرو تم ځایونو د ظرفیت ارزونې لپاره پلاوی وګومارل شو
۱۴۴۷/۱۲/۰۷
د کور او ښار جوړولو وزارت د ښاري چارو د محترم معین شیخ مدار علي کریمي بامیاني په مشرۍ په هغې غونډه کې چې د مالیې، ترانسپورټ، اقتصاد، کور او ښار جوړولو وزارتونو، کابل ښاروالۍ او د اداري چارو لوی ریاست د حکمونو او فرمانونو د څار استازو ګډون کړی و، د کابل ښار په لوړو ودانیو کې په لاندې پوړ کې د موټرو تم ځایونو د ظرفیت ارزونې پر څرنګوالي بحث او د نظرونو تبادله وشوه.
په غونډه کې د داسې مناسبې حللارې او ظرفیت ارزونې پر اړتیا ټینګار وشو، چې وکولای شي په کابل ښار کې د موټرو د تمځایونو ستونزې راکمې کړي.
ګډونوالو وویل، اوسمهال په ځینو لوړو ودانیو کې د موټرو تمځایونو نشتوالی د ګڼې ګوڼې او ترافیکي ستونزو لامل شوی، چې باید ورته جدي پاملرنه وشي او دا بهیر په دوامدار ډول د کابل ښار په ټولو سیمو کې عملي شي.
د غونډې د پرېکړې له مخې، ټاکل شوې یاد پلاوی له لوی اختر وروسته د کابل ښار د ناحیو له مسؤلینو سره په همغږۍ خپل کار پیل کړي او په لومړي پړاو کې به د لومړۍ، دوهمې، درېیمې، څلورمې او پنځمې ناحیې اړوند سیمې د لومړیتوب له مخې تر پوښښ لاندې ونیسي.
همداراز پلان شته چې په راتلونکو پړاوونو کې دا بهیر د کابل ښار ټولو ۲۲ ناحیو ته وغځول شي، څو د ښاري نظم او ترافیکي اسانتیاوو د ښه والي لپاره اغېزمن ګامونه واخیستل شي.
