چینایي پانګوال په پېروزي ښارګوټي کې د تولیدي شرکتونو برخه کې پانګونه کوي
۱۴۴۳/۰۹/۰۸
د ښار جوړولو او ځمکو وزارت سرپرست محترم مولوي حمدالله نعماني په خپل کاري دفتر کې د چینایي ساختماني شرکت له مسوولینو سره وکتل او د کابل ولایت په ده سبز ولسوالۍ کې د پیروزي استوګنې پروژې کې یې د تولیدي شرکتونو د جوړولو په اړه بشپړې خبرې وکړې.
لومړی د یاد ساختماني شرکت مسوولینو د پيروزي استوګنې پروژې په صنعتي سیمو کې د ځمکې د انتقال او هوکړه لیک په اړه خبرې وکړې چې مخکې یې د ښار جوړولو او ځمکو وزارت سره یادونه کړې وه، او زیاته یې کړه چې دوی چمتو دي چې په یاده سیمه کې پانګونه وکړي او له وزارت یې غوښتنه وکړه چې زمینه ورته برابره کړي.
د ښار جوړولو او ځمکو وزارت سرپرست ډاډ ورکړ چې د پېروزي استوګنې پروژې کې به ورته د پانګونې لپاره بشپړه زمینه برابره کړي او ډېر ژر به یې پرانسته وکړي.
ښاغلي مولوي حمد الله نعماني زیاته کړه چې یاده موضوع به د امارت له اړونده مسؤلینو سره هم شریکه او په یو پیاوړي موقف کې پیل کړي.
تمه ده چې په نږدې راتلونکي کې به یو شمېر چینایي تولیدي شرکتونه د پېروزي ښارګوټي په څنډو کې خپل پیاوړی او اغېزمن فعالیت پیل کړي.
