په کابل کې د سوداګرۍ او پانګونې خونې اړوند ۱۰ جریبه ځمکه سروې شوه
۱۴۴۷/۹/۸
د کور او ښار جوړولو وزارت، د سروې او جي، ای ایس محترم ریاست تخنیکي ټیم له لوري د کابل ولایت په مربوطاتو کې د سوداګرۍ او پانګونې خونې اړوند ساحه کې د توپوګرافیکي سروې چارې په بریالیتوب سره ترسره کړې.
یاده سروې په کابل ښار کې د افغانستان د سوداګرۍ او پانګونې خونې اړوند پر ۱۰ جریبه ځمکه ترسره شوه، چې موخه یې د لوړپوړو پلانونو (ماستر پلان) په اړه تخنیکي نظر وړاندې کول او د راتلونکو انکشافي پروژو لپاره د دقیقو معلوماتو برابرول دي.
د سروې او جي ای ایس ریاست له لوري په ساحه کې د ځمکې دقیق ابعاد او حدود تثبیتول شول، لوړې ساحې او طبیعي جوړښتونه ثبت شول، د ځمکې د موجوده وضعیت توپوګرافیکي نقشه برابره او د جي ای ایس سیستم له لارې د معلوماتو ډیجیټلي ثبت او تحلیل ترسره شو.
دغه معلومات به د ماستر پلان د طرحې، ارزونې او پرېکړې نیولو په بهیر کې مهم تخنیکي بنسټ وګرځي، څو راتلونکې ودانیزې او انکشافي چارې د معیاري ښاري اصولو مطابق تنظیم شي.
د پروژې اهمیت دا دی، چې د دقیقو سروې ګانو ترسره کول د ښاري پراختیا لپاره اساسي ارزښت لري، ځکه د هر ډول لویو پروژو بنسټ پر همدغو تخنیکي معلوماتو ولاړ وي.
د یادې ۱۰ جریبه ځمکې سروې به د سوداګرۍ او پانګونې اړوند احتمالي تأسیساتو د منظم پلان جوړولو او تطبیق لپاره زمینه برابره کړي.
