په نوي کابل ښار کې د غیرپلاني او بېاجازې ودانیزو فعالیتونو مخه ونیول شوه
1448/1/29
د کور او ښار جوړولو وزارت د ښاري تخلفاتو د مخنیوي او د پروژو د تطبیق د څارنې محترم عمومي ریاست اړوند د ښاري سرغړونو د څارنې ریاست تخنیکي ټیم له لوري د کابل نوي ښار د صنایع سبز صنعتي پروژې په ساحه کې د هغو تولیدي او صنعتي فابریکو ودانیز فعالیتونه ودرول شول، چې د وزارت له اصولو سره سم یې د ودانیزو نقشو د تأیید (ویزې) پروسه نه وه بشپړه کړې.
یاده څارنه د وزارت د مقام د لارښوونې او د منظم نظارتي پلان له مخې ترسره شوه، چې موخه یې د غیرپلاني او بېمجوزې ساختماني فعالیتونو مخنیوی او د ښاري اصولو د پلي کېدو ډاډ ترلاسه کول وو.
د څارنې پر مهال، هغو فابریکو ته چې له قانوني مراحلو او د ودانیزو نقشو له تأیید پرته یې ساختماني چارې روانې کړې وې، د نافذه مقرراتو له مخې د فعالیتونو د درولو لارښوونه وشوه او د غیرقانوني ساختماني چارو مخه ونیول شوه.
د کور او ښار جوړولو وزارت د ښاري نظم د ټینګښت، د غیرمعیاري او غیرپلاني ودانیو د مخنیوي، د ښاري پلانونو د ساتنې او د کیفیت لرونکو ساختماني چارو د پراختیا په موخه د کابل ښار په بېلابېلو سیمو کې د څارنې بهیر په دوامداره توګه ترسره کوي.
