په ننګرهار کې د څو ښارګوټو تخنیکي چارې بشپړې او د استوګنیزو نمرو د وېش بهیر چټک شوی
۱۴۴۷/۱۱/۲۶
د کور او ښار جوړولو وزارت د محترم وزیر الحاج مولوي نجیب الله حیات حقاني، له لوري استول شوو تخنیکي ټیمونو د ننګرهار ولایت د کور او ښار جوړولو ریاست په همغږۍ او همکارۍ، د یو شمېر استوګنیزو ښارګوټو تخنیکي چارې بشپړې کړې.
ننګرهار کې د کور او ښار جوړولو ریاست محترم رئیس انجنیر احمدالله زاهد وایي، د ځینو ښارګوټو د تخنیکي چارو له بشړېدو سره سم د استوګنیزو نمرو د وېش بهیر چټک شوی دی.
نوموړی وایي، د زلزله ځپلو لپاره د جوړ شوي ښارګوټي د خط اچولو چارې بشپړې شوې دي، چې ورسره به د استوګنیزو نمرو د تثبیت او وېش بهیر لا منظم او چټک شي.
همداراز، د ننګرهار ولایت د روداتو ولسوالۍ کې د امیرالمؤمنین حفظه الله په نوم د مهاجرینو په ښارګوټي کې د شاوخوا شپږ سوه استوګنیزو نمرو د تازه خط اچولو چارې هم ترسره شوې دي او د پاتې نورو نمرو تخنیکي چارې په چټکۍ سره روانې دي.
د دغو پروژو موخه راستنېدونکو مهاجرو کورنیو ته د منظمې استوګنې برابرول، د ښاري خدمتونو د تنظیم زمینه مساعدول او د استوګنیزو ښارګوټو د معیاري پراختیا تضمین دی.
