په لښکرګاه ښار کې د یوه پټرول پمپ له ودانیزو چارو څخه تخنیکي څارنه ترسره شوه
۱۴۴۸/۱/۲۵
د هلمند ولایت د کور او ښار جوړولو ریاست د ښاري سرغړونو مخنیوي تخنیکي ټیم د ورځنیو څارنو په لړ کې، د لښکرګاه ښار د شپږمې ناحیې په مربوطاتو کې د یوه پټرول پمپ له ودانیزو چارو څخه تخنیکي څارنه ترسره کړه.
د تخنیکي ارزونې پر مهال څرګنده شوه، چې یاد پټرول پمپ د ستراتیژیک پلان له ټاکل شوې ځمکنۍ کارونې سره په ټکر کې جوړ شوی، منظور شوی سکېچ نه لري، قانوني مساحت او ټاکل شوې فاصلې پکې نه دي رعایت شوي او په غیرپلاني ساحه کې یې غیرقانوني ودانیز فعالیتونه ترسره کړي، چې د نافذه قوانینو او ښاري اصولو له مخې ښاري سرغړونه ګڼل کېږي.
له همدې امله د پروژې ټولې ودانیزې چارې ودرول شوې، ساحه مهر او لاک شوه او د پټرول پمپ مالک ته لارښوونه وشوه، چې تر هغو به هېڅ ډول ودانیز فعالیت نه ترسره کوي، څو قانوني اسناد، اړین جوازونه او د پروژې منظور شوی سکېچ ترلاسه نه کړي. همدارنګه، له نوموړي څخه د نافذه قوانینو او مقرراتو د رعایت او د ودانیزو چارو د نه دوام په اړه رسمي تعهد هم واخیستل شو.
د هلمند ولایت د کور او ښار جوړولو ریاست د ښاري نظم د ټینګښت، د ستراتیژیکو او تفصیلي پلانونو د خوندي تطبیق او د غیرقانوني ودانیزو فعالیتونو د مخنیوي په موخه خپلو تخنیکي څارنو ته په دوامداره توګه ادامه ورکوي او د هر ډول ښاري سرغړونې پر وړاندې به د نافذه قوانینو له مخې لازم قانوني اقدامات ترسره کړي.
