محترم محمد جواد پیکار: کندهار کې د دهلې بند انکشاف لپاره د تصفیې په برخه کې را ولاړو شویو خندونو ته رسېدنه کیږي
د ښار جوړولو او ځمکو سرپرست وزیر محترم محمد جواد پیکار، د کرنې او پراختیا په چارو کې د جمهوري ریاست عالي مقام ستر سلاکار، محترم عبدالحمید هلمندي، د اوبو او انرژۍ وزارت د اوبو مرستیال محترم خان محمد تکل او د ښار جوړولو او ځمکو وزارت یو شمېر مرکزي رییسانو سره په کتنه کې، د کندهار د دهلې بند د اړوندو ساحو د تصفیې په تړاو د اجتماعي ستونزو د حل په موخه غونډه وکړه.
په لومړي سر کې محترم عبدالحمید هلمندي او محترم خان محمد تکل د یاد بند په تړاو د ترسره شویو فعالیتونو یادونه وکړه او زیاته یې کړه چې د سیمې خلک د بند د اړوندو ساحو د تصفیې اجازه نه ورکوي او د بدیل غوښتونکي دي.
د ښار جوړولو او ځمکو سرپرست وزیر وویل، د دغې ټولنیزې ستونزې هواري په موخه لازمه ده چې د سیمې د خلکو له استازیو سره د تصفیې د چارو ترسره کولو په موخه دې هوکړهلیک لاسلیک شي.
د محترم محمد جواد پیکار په وینا اړتیا ده چې په دې هوکړهلیک د ولس په ګډون د ټولو خواوو دندې او مکلفیتونه واضح شي.
د ښار جوړولو او ځمکو سرپرست وزیر د دغې ارزښتناکې پروژې لپاره دې د عمل پلان هم جوړ شي، څو ټول کارونه د مهال وېش پر اساس پر مخ ولاړ شي.
د یادونې ده چې د ښار جوړولو او ځمکو وزارت د کندهار په ارغنداب ولسوالۍ کې د دهلې بند د تصفیې چارې پر مخ وړي چې پر مټ به یې یاد بند د پراختیا په موندلو سربېره، زیاته برخه ځمکه خړوبه کړي.
