محترم محمد جواد پيکار: د ټاپي پروژې په مسير کې د ۱۲،۶ کيلو مترو د مالکيت حق تثبيتول، د يادې پروژې په تطبيق کې ستر ګام دی
د ښار جوړولو او ځمکو وزارت سرپرست محترم محمد جواد پيکار د ځمکوالۍ چارو معين او د مرکز يو شمېر رئيسانو په شتون کې د (TPCL) کمپنۍ له اجرائيوي رئيس محترم محمد مراد امانوف سره د ټاپي قانون او د مالکيت حق د تثبيت چارو پر چټکوالي، استملاک، ارزښتټاکنې او د نلليکې په دواړو خواوو کې پر خونديتوب هر اړخيز بحث وکړ.
په لومړي سر کې محترم محمد مراد امانوف په ټاپي پروژه کې د ښار جوړولو او ځمکو وزارت د سرپرست ځانګړی ملاتړ او همکاري وستايله او د نلليکې د شاوخوا سيمو د خونديتوب په برخه کې يې یو لړ وړانديزونه هم وکړل.
ورپسې محترم محمد جواد پيکار وويل چې د نلليکې د دواړو خواوو خونديتوب او چاپېريال ته يې د زيان مخنيوی؛ د ښار جوړولو او ځمکو وزارت له لومړيتوبونو څخه دي.
د ښار جوړولو او ځمکو وزارت سرپرست زياته کړه چې دې وزارت د (TPCL) کمپنۍ، عدليي وزارت او د کانونو او پټروليم وزارت په نږدې همکارۍ د ټاپي پروژې لپاره يو ځانګړی قانون ترتيب کړی دی.
محترم محمد جواد پيکار نړيوالو معيارونو ته په اشارې د پاليسۍ او پلان رياست ته لارښوونه وکړه چې د ټاپي قانون په ۲۵مه ماده کې دا ډول تعديل راوړي: « د سيمې د خونديتوب او د چاپېريال ساتنې لپاره د نلليکې په شاوخوا کې تر ۲۰۰ مترو پورې د ودانيو جوړولو ته اجازه نشته، خو د کښت او کرنې لپاره ترې استفاده کېدای شي»
د ښار جوړولو او ځمکو وزارت سرپرست زياته کړه چې د ټاپي ځانګړی قانون نهايي شوی او له ذيربطو دولتي ادارو سره له شريکولو وروسته به کابينې ته د تصويب او وروسته به ولسي جرګې ته د منظورۍ په موخه واستول شي.
محترم محمد جواد پيکار روښانه کړه چې د جلالتماب جمهور رئيس د لرليد په اساس به د ټاپي مسير پر لوی ترانزيټي او اقتصادي دهليز بدل شي او مرکزي اسيا به له سويلي اسيا سره ونښلوي.
د ښار جوړولو او ځمکو وزارت سرپرست په پای کې وويل چې د مالکيت حق د تثبيت لړۍ د هرات ولايت د کشک رباط سنګي له ولسوالۍ او د ترکمنستان له پولې پيل شوې او تر اوسه په دې ولايت کې له ديرشو کليومترو له ډلې يې د ۱۲،۶ کيلو مترو د مالکيت حق تثبيت شوی.
