فراه ولایت کې اجباري راستنېدونکو کډوالو ته د ځمکو د وېش د فورمو نوم لیکنه پیل شوه
۱۴۴۶/۱۰/۱۶
فراه کې د کور او ښار جوړولو ریاست محترم رئیس مولوي نصرالله استقلال وایي، له ګاونډیو هېوادونو په اجباري توګه د راستنېدونکو کډوالو لپاره د دایمي اوسېدو په موخه د ځمکو د وېش بهیر پیلولو په موخه د فورمو ډکولو لړۍ یې پیل کړه.
ښاغلی مولوي استقلال وایي، یاد بهیر د اړوندو ادارو تر منځ د نږدې همغږۍ او همکارۍ په چوکاټ کې د یوې ځانګړې کمیټې تر څار لاندې پر مخ وړل کېږي، چې مشري یې د فراه ولایت د کور او ښار جوړولو ریاست کوي.
نوموړی وایي، د کمیټې د پرېکړې مطابق، د فورمو ډکول او د غوښتونکو معلوماتو تثبیت، د فراه ولایت د کور او ښار جوړولو ریاست کې په شفاف او منظم ډول ترسره کېږي.
ښاغلی مولوي استقلال وایي، د نوم لیکنې بهیر حضوري دی او د کډوالو چارو محترم وزارت له خوا برابر شوي رسمي فورم له مخې ترسره کېږي.
د معلوماتو له مخې، غوښتونکي کسان د اړینو اسنادو سره، د کور او ښار جوړولو ریاست ته مراجعه کوي، چې له ارزونې وروسته فورمونه ډک او تثبیت کېږي او بیا د وروستۍ ارزونې لپاره کمېټې ته سپارل کېږي.
د کمیټې د غړو فعال حضور او د اړوندو ادارو تر منځ بشپړه همغږي، د دې ملي برنامې د شفاف، عادلانه او چټک تطبیق ښکارندوی دی.
