سرپُل ولایت کې د هغه مارکېټ له چارو څارنه وشوه، چې له جواز اخیستلو پرته د جوړېدو په حال کې دی
۱۴۴۷/۹/۲۶
سرپُل ولایت کې د کور او ښار جوړولو محترم ریاست د تخنیکي ټیم له لوري، د سرپُل ښار د لومړۍ ناحیې اړوند له یو شمېر ودانیزو فعالیتونو تخنیکي لیدنه او څارنه وکړه.
دغه څارنه د کور او ښار جوړولو وزارت اړوند له ښاري سرغړونو د مخنیوي او د پروژو پر تطبیق د څار محترم عمومي ریاست په همغږۍ ترسره شوه.
د یادې څارنې موخه د هغو ودانیو د جوړېدو مخنیوی و، چې د ښار جوړولو له پلان او نافذه قوانینو پرته په خپلسرې توګه جوړېږي.
د سرپُل ولایت د کور او ښار جوړولو محترم ریاست د تخنیکي ټیم د څارنې په مهال څرګنده شوه چې په یاده ساحه کې یو سوداګریز مارکېټ د نقشې له ویزه کېدو او د جوړولو د رسمي جواز له اخیستلو پرته جوړېږي.
د ترسره شوې څارنې په ترڅ کې د مارکېټ څښتن ته سپارښتنه وشوه، چې لومړی باید خپله ودانیزه نقشه له اړوندو ادارو څخه ویزه کړي او د جوړولو قانوني رسمي جواز ترلاسه کړي.
همدارنګه ټینګار وشو چې که له یادو لارښوونو سره سم عمل ونه شي، نو د ودانیزو چارو بهیر به ودرول شي او د ښار جوړولو د نافذه اصولو او مقرراتو له مخې به قانوني چلند وشي.
د کور او ښار جوړولو وزارت، د ښاري اصولو د پلي کېدا او د سرغړونو د مخنیوي لپاره دا ډول نظارتي څارنې په دوامداره توګه ترسره کوي.
