د یتیمانو ښارګوټي د ودانیز چارو څخه څارنه وشوه
۱۴۴۷/۷/۱
د هلمند ولایت د کور او ښار جوړولو ریاست محترم رئیس وایي، د یتیمانو ښارګوټي د ودانیزو چارو بشپړ تخنیکي نظارت ترسره شو، چې یاد نظارت د کور او ښار جوړولو وزارت د هدایت پر اساس ترسره شوی دی.
ښاغلي رئیس زیاته کړه چې د یتیمانو ښارګوټي پروژه د قطر د شاهی کورنۍ د خیریه بنسټ مالي ملاتړ لري او د ښارګوټي تطبیق هم د یاد خیریه بنسټ له لوري پر مخ وړل کېږي، په یاد ښارګوټي کې استوګنیز واحدونه، جامع جومات، تفریحي ځایونه او نورې اسانتیاوې په پام کې نیول شوې دي.
اوس مهال په پروژه کې د ودانیو د چت قالب بندي، پلسترکاري او د چت کانکریټ اچونه په موازي ډول روانه ده. د تخنیکي ټیم لخوا د پروژې د چارو د کیفیت د یقیني کولو لپاره ساحوي انجینر ته لازمي لارښوونې ورکړل شوې، چې ټول ودانیز فعالیتونه د انجینري اصولو او نقشې سره سم ترسره شي او د کاریګرو خوندیتوب تضمین شي.
د هلمند ولایت د کور او ښار جوړولو ریاست ټینګار کوي چې ټولې چارې به په معیارونو سره ترسره او د ښارګوټي پرمختیا به په دوامداره توګه څارل کېږي.
