د ګردېز ښار لپاره د یو واحد او جامع تفصیلي پلان د طرحې پرېکړه وشوه
د ۱۴۴۷/۰۲/۰۹
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په مشرۍ د ښاري نقشه وو د ځانګړي کمیسیون غونډه ترسره شوه، په دې غونډه کې د ګردېز ښار لپاره د یو واحد او جامع تفصیلي پلان د طرحې او همدارنګه د ښارګوټو او د لوړو زده کړو د مؤسسې لپاره د ځینو تفصیلي پلانونو د منظورۍ په اړه بحث او د نظرونو تبادله وشوه.
په غونډه کې ټینګار وشو چې باید د ګردېز لپاره داسې یو واحد تفصیلي پلان ترتیب شي چې د ښار ټولې برخې په جامع ډول تر پوښښ لاندې راولي او د دغه ښار د پرمختګ او پراختیا لامل وګرځي، همداراز و ویل شول چې پلان دې د تخنیکي نظرونو په پام کې نیولو سره ترتیب او طرحه شي.
همدارنګه د پکتیکا ولایت د ارګون ولسوالۍ د اصلاح شوي تفصیلي پلان ارزونه وشوه او ټینګار وشو چې موجوده ستونزې دې حل شي او د پلانونو په ترتیب او طرح کې دې لازمه پاملرنه وشي.
په ورته وخت کې د لوګر ولایت د لوړو زده کړو مؤسسې د ودانۍ تفصیلي پلان هم له هر اړخیزې ارزونې لاندې ونیول شو.
پر دې سربېره، په ښارونو کې د غیر پلاني سیمو د جوړولو ستونزې، د ښاري تخلفاتو د مخنیوي لارې چارې، د لوړپوړو ودانیو ځانګړې نقشې او د استوګنیزو ساحو څخه سوداګریزوسیمو ته د تعدیل غوښتنې هم وڅېړل شوې.
ښاغلي شیخ مدارعلي کریمي بامیاني وویل، د ښارونو پرمختګ او پراختیا د معیاري پلانونو اړتیا ده تر څو زموږ خلکو ته په ښارونو کې اسانتیاوې برابرې شي او د ښاري هوساینې لپاره هڅې وشي، نوموړي ټینګار وکړ چې ټولې تعدیلي غوښتنې دې له ماسټر پلانونو او ښاري تفصیلي پلانونو سره په مطابقت کې وڅېړل شي او بیا دې د ښاري نقشو په ځانګړي کمیسیون کې پرې لازمې پرېکړې وشي.
