د کور او ښار جوړولو وزیر په کابل کې د جاپان له سفیر سره وکتل
۱۴۴۷/۵/۲۱
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې، په کابل کې د جاپان له سفیر، ښاغلي کینیچي ماساموتو او مل پلاوي سره وکتل.
په کابل کې د جاپان سفیر د خپلې دندې او هېواد په تړاو معلومات وړاندې کړل او په اوس وخت کې یې له افغانستان سره د شته اړیکو او مرستو په اړه یادونه وکړه.
نوموړي وویل، د افغنستان هر اړخیزې خپلواکۍ ته درناوی لري او هڅې کوي چې افغانستان د نړیوالې ټولنې یو فعال غړی و اوسېږي.
د ښاري پراختیا برخه کې یې یادونه وکړه چې خپلې مرستې د نړیوالو ادارو او مؤسسو له لوري ترسره کوي او دغې چارې ته به دوام ورکړي.
د کور او ښار جوړولو وزارت محترم وزیر الحاج مولوي نجیب الله حیات حقاني، نوموړي او مل پلاوي ته یې د ښه راغلاست ترڅنګ د افغانستان او جاپان ترمنځ د اړیکو تاریخي مخینې یادونه وکړه او له امله یې د مثبتو تګلارو او د جاپان له مرستو خوښي څرګنده کړه.
هغه زیاته کړه، جاپان د افغان ولس یو باوري ملګری دی چې په بېلابېلو برخو کې یې د افغانستان د پرمختګ، بیارغونې او بشري اړتیاوو د پوره کولو لپاره مهم رول لوبولی دی.
محترم وزیر غوښتنه وکړه چې جاپان دې د ساختمان، پاکو اوبو او زېربنايي پروژو په برخه کې خپلې مرستې پراخې کړي او د پاتې پروژو د بشپړېدو لپاره دې لازم ملاتړ ته دوام ورکړي.
نوموړي وویل، افغانستان چې له تېرې نږدې نیمې پېړۍ راهیسې له بېلا بېلو ستونزو سره مخامخ و او له امله یې ښاري او مسکن برخه هم زیانمنه شوې، نو اړتیا ده چې دغه برخو ته زیاته پاملرنه وشي.
محترم وزیر مولوي نجیب الله حیات حقاني یادونه وکړه، چې د نوي کابل ښار لومړي فاز ته د څښاک اوبو رسول چې په تېر کې یې د جاپان هېواد جایکا مؤسسې له لوري تړون هم شوی، باید سرته ورسېږي او دغه راز د نوي کابل ښار په تړاو اساسي معلومات (ډېټا) چې له جایکا سره ده، باید د کور او ښار جوړولو وزارت ته ورکړل شي، ترڅو ترې سالمه ګټه پورته شي او خلکو ته یې ګټه ورسېږي.
د دغه وزارت د مسلکي ظرفیتونو لوړول او افغانستان ته د پانګونې په موخه د جاپاني پانګوالو راجلبول، نور هغه موارد وو، چې محترم وزیر الحاج مولوي نجیب الله حیات حقاني ترې یادونه وکړه.
د ناستې په پای کې، په کابل کې د جاپان سفیر وویل، د نوي کابل ښار اوبو او ډېټا په اړه به له خپلو نورو همکارانو او هېواد سره خبرې وکړې او بیا به معلومات شریک کړي.
