د کور او ښار جوړولو وزیر د ننګرهار په خوګیاڼو ولسوالۍ کې د مهاجرینو د ښارګوټي د خط اچونې له چارو لیدنه وکړه
۱۴۴۷/۱۱/۱۷
د کور او ښار جوړولو وزارت محترم وزیر الحاج مولوي نجیبالله حیات حقاني او د ننګرهار ولايت محترم والي حاجي ملا محمد نعيم اخند چې متخصص او مسلکي ټيمونو يې ملتيا کوله د ننګرهار ولایت د خوګیاڼو ولسوالۍ اړوند د چمتلې په ساحه کې د مهاجرینو لپاره د جوړېدونکي ښارګوټي د خط اچونې له روانو چارو څخه لیدنه وکړه او د یادې پروژې تخنیکي او عملي وضعیت یې له نږدې وارزاوه.
په دې لیدنه کې، د پروژې مسؤلینو د خط اچونې د پرمختګ، تخنیکي معیارونو، د ځمکو د تنظیم څرنګوالي او د پاتې کارونو په اړه تفصیلي معلومات وړاندې کړل.
د کور او ښار جوړولو محترم وزیر د چارو د لا ښه تنظیم، چټکتیا او د معیارونو د مراعت په ټینګار سره اړوندو مسؤلینو ته لازمې لارښوونې وکړې، تر څو یاد ښارګوټی په منظم، او معیاري ډول مهاجرینو لپاره چمتو شي.
نوموړي همداراز ټینګار وکړ چې د ښارګوټو په جوړولو کې باید د اساسي خدماتو لکه سړکونو، اوبو رسونې، برېښنا او نورو ښاري اسانتیاوو ته ځانګړې پاملرنه وشي، تر څو راتلونکی استوګنیز چاپېریال د اوسېدونکو اړتیاوو ته ځواب ویونکی وي.
دغه لیدنه د مهاجرینو د اسکان د بهیر د اغېزمنتیا، شفافیت او د معیاري ښار جوړونې د تامین په موخه ترسره شوه
