د کور او ښار جوړولو وزارت ته د استوګنیزو او ښاري پراختیايي پروژو لپاره د ځمکو د انتقال بهیر ترسره شو
۱۴۴۸/۱/۱۱
د اسلامي امارت د زعیم عالیقدر امیر المؤمنین حفظه الله د حکم په اساس، د استوګنیزو پروژو د تطبیق او خلکو ته د اسانتیاوو برابرولو په موخه یوپنځوس (۵۱) جریبه ځمکه په کابل کې د کور او ښار جوړولو وزارت ته ولېږدول شوه.
د کور او ښار جوړولو وزارت، د حقوقي اعتبار ورکولو محترم ریاست وایي، یاده ځمکه دوه قطعې ده چې (۹) نهه جریبه ځمکه یې د کابل په دهسبز ولسوالۍ کې او (۴۲) دوه څلوېښت جریبه نوره ځمکه په بګرامیو ولسوالۍ کې موقعیت لري.
د ځمکو د انتقال دغه رسمي بهیر، د کرنې، اوبولګولو او مالدارۍ محترم وزارت د اراضۍ لوی ریاست له لوري د کور او ښار جوړولو وزارت ته د استوګنیزو او ښاري پراختیايي پروژو د پلي کېدو په موخه، ترسره شو.
یاد انتقال د اړوندو مسؤلینو ترمنځ د رسمي هوکړه لیک له مخې ترسره شو، چې موخه یې د منظم ښار جوړولو پراختیا، د استوګنیزو اړتیاوو پوره کول او د ښاري پراختیايي پروژو پیاوړتیا ده.
د کور او ښار جوړولو وزارت د دې اقدام هرکلی کوي او ټینګار کوي، چې د یادو ځمکو په ترلاسه کېدو سره به د معیاري ښارګوټو او استوګنیزو بلاکونو د جوړولو چارې د نافذه تخنیکي او حقوقي اصولو مطابق پر مخ یووړل شي.
