د کابل ښار په ۱۲مه ناحیه کې د ښاري تخلفاتو د مخنیوي په موخه تخنیکي څارنه ترسره شوه
۱۴۴۷/۱۲/۰۴
د ښاري تخلفاتو د مخنیوي او د پروژو د تطبیق د کنټرول کیفیت د عمومي ریاست اړوند د ښاري تخلفاتو د مخنیوي ریاست تخنیکي ټیمونو، د دوامدارو نظارتي پلانونو په لړ د کابل ښار ۱۲مې ناحیې اړوند د احمد شاه باب مینې څخه تخنیکي نظارت ترسره کړ.
د څارنې په ترڅ کې د یادې سیمې بېلابېل برخې وڅارل شوې او څرګنده شوه چې په ځینو شنو ساحو کې د هټیو غیرقانوني ودانیزې چارې ترسره شوې دي، چې له امله یې ځینې جوړ شوې دوکانونه مهر او لاک شول او هغه ساختماني کارونه چې روان وو، سمدستي ودرول شول.
همداراز ټولو مالکینو ته سپارښتنه وشوه چې د خپلو پروژو قانوني اسناد، جوازونه او رسمي مدارک اړوند ریاست ته وړاندې کړي، څو د منظور شوو ښاري پلانونو سره د مطابقت له ارزونې وروسته لازم قانوني اجراآت ترسره شي.
د ښاري سرغړونو د مخنیوي په موخه د څارنو دا لړۍ به د پلان له مخې په دوامداره ډول د کابل ښار په نورو سیمو کې هم جریان ولري، څو د ښاري نظم د ټینګښت او د غیرقانوني ودانیو د مخنیوي په برخه کې لازم اقدامات ترسره شي.
