د کابل ښار په نهمه ناحیه کې د پنځم مکروریان ښارګوټي له پروژې تخنیکي څارنه ترسره شوه
۱۴۴۷/۱۰/۲۲
د کور او ښار جوړولو وزارت د ساختماني او زیربنایي چارو د تطبیق د څار ریاست اړوند تخنیکي ټیم له لوري، د دوامدارو تخنیکي څارنو په لړ کې د کابل ښار په نهمه ناحیه کې د پنځم مکروریان ښارګوټي له پروژې څخه ساحوي تخنیکي څارنه ترسره شوه.
دغه څارنه د کور او ښار جوړولو وزارت اړوند د ښاري سرغړونو د مخنیوي او د پروژو پر تطبیق د څار محترم عمومي ریاست د هدایت پر بنسټ ترسره شوه.
د څارنې پر مهال د پروژې په بېلابېلو بلاکونو کې د ودانیو د بېروني رنګمالۍ، د کړکیو د ښیښو نصب، د پوړونو د سلب قالب تړل او د خونو د خشتکارۍ چارې روانې وې، چې ټول یاد فعالیتونه د تخنیکي ټیم له لوري په هر اړخیزه توګه وڅارل شول.
یاده پروژه د اوسپنیز-کانکریټي تونلي سیستم پر بنسټ طرحه شوې، چې ډېری بلاکونه یې ۱۸ پوړیز دي، دغه ښارګوټی د استوګنیزو او سوداګریز واحدونو په ګډه بڼه، د عصري اسانتیاوو او معیاري اصولو په رعایت سره د کابل ښار په نهمه ناحیه کې، څلورم مکروریانو ته څېرمه په ستراتیژیک موقعیت کې تر جوړېدو لاندې دی، چې د یوې ترکي ساختماني کمپنۍ له لوري تطبیقېږي.
د څارنې په ترڅ کې د ساحوي انجنیرانو او د تطبیقوونکي شرکت مسؤلینو ته لازمې لارښوونې وشوې، څو چارې د قرارداد له تخنیکي اسنادو، ملي او نړیوالو معیارونو او د کار د خوندیتوب اصولو سره سم پرمخ یوسي.
د ساختماني او زیربنایي پروژو دوامداره تخنیکي څارنه د کار د کیفیت د لوړولو، د معیارونو د رعایت او د ښاري پراختیا د منظم بهیر د تأمین لپاره مهمه بلل کېږي.
