د کابل ښار په دوهمه ناحیه کې د پل محمود خان د استوګنیز او سوداګریز کمپلکس له پروژې تخنیکي څارنه ترسره شوه
۱۴۴۷/۱۰/۲۲
د کور او ښار جوړولو وزارت د ساختماني او زیربنایي چارو د تطبیق د څار ریاست اړوند تخنیکي ټیم له لوري، د دوامدارو تخنیکي څارنو په لړ کې د کابل ښار په دوهمه ناحیه کې د پل محمود خان د استوګنیز او سوداګریز کمپلکس له پروژې څخه ساحوي تخنیکي څارنه ترسره شوه.
یاده څارنه د اسلامي امارت د کابینې د مصوبو او د وزارت د مقام د هدایت پر بنسټ ترسره شوې، چې په ترڅ کې یې د پروژې روانې ساختماني چارې له نږدې وکتل شوې.
د څارنې پر مهال د ودانیزو چارو په بېلابېلو برخو کې د دوهم پوړ د سلب سیخ تړل، د سلب قالب تړل همدارنګه د پایو او شیروال اړوند کارونه روان وو، چې ټول یاد فعالیتونه د تخنیکي ټیم له لوري په هر اړخیزه توګه وڅارل شول.
یاده پروژه د ملي پراختیا شرکت له لوري په ۱۴ پوړونو او درېیو برخو کې پلي کېږي، چې استوګنیزه برخه یې ۱۳۰ د استوګنې واحدونه او سوداګریزه برخه یې ۸۰ واحدونه لري.
دغه کمپلکس د عصري اسانتیاوو او معیاري اصولو په رعایت سره د کابل ښار په دوهمه ناحیه کې په ستراتیژیک موقعیت کې تر جوړېدو لاندې دی.
د څارنې په ترڅ کې د ساحوي انجنیرانو او د پروژې مسؤلینو ته لازمې تخنیکي لارښوونې وشوې، څو چارې د قرارداد له تخنیکي اسنادو، ملي او نړیوالو معیارونو او د کار د خوندیتوب اصولو سره سم پرمخ یوړل شي.
د ساختماني او زیربنایي پروژو دوامداره تخنیکي څارنه د کیفیت د لوړولو، د معیارونو د رعایت او د ښاري پراختیا د منظم بهیر د تضمین لپاره اړینه بلل کېږي.
