د کابل ښار په درېیمه ناحیه کې د ښاري تخلفاتو د مخنیوي په موخه څارنه ترسره شوه
۱۴۴۷/۱۲/۲۱
د ښاري تخلفاتو د مخنیوي او د پروژو د تطبیق د کنټرول کیفیت د عمومي ریاست اړوند د ښاري تخلفاتو د مخنیوي ریاست تخنیکي ټیمونو، د دوامدارو نظارتي پلانونو په لړ کې
د کابل ښار درېیمې ناحیې اړوند په کارته سخي، ده بوري او د سیلو په ځینو سیمو کې د ساختماني پروژو څخه نظارت او ارزونه ترسره کړه.
د نظارت پر مهال هغه ساختماني پروژې وڅېړل شوې چې د نافذه قوانینو، منظور شوو ښاري پلانونو او د ګاونډیانو د حقونو د نقض احتمال پکې موجود و.
همدارنګه د هغو ودانیو وضعیت وارزول شو چې د غیرقانوني کړکیو د جوړولو په څېر احتمالي تخلفات پکې لیدل کېدل.
د څېړنو په پایله کې د هغو ساختماني پروژو چارې ودرول شوې چې د نافذه قوانینو او ښاري اصولو خلاف یې فعالیت کاوه.
سربېره پر دې، له هغو مالکینو څخه چې د خپلو پروژو قانوني اسناد، جوازونه او اړوند مدارک یې نه وو وړاندې کړي، غوښتنه وشوه چې خپل اسناد د ښاري تخلفاتو د څېړنې ریاست ته وسپاري، ترڅو له دقیقې ارزونې او د منظور شوو پلانونو له تطبیق وروسته د اړتیا په صورت کې قانوني اقدامات ترسره شي.
د یادو نظارتونو موخه د ښاري پلانونو مطابق د ودانیو جوړول، د بې نظمۍ پراختیا او اضافي تراکم مخنیوی، د ښاري نظم تأمین، د ګاونډیانو د حقونو او شخصي حریم ساتنه، د ساختماني کیفیت لوړول او د ښاري مدیریت پیاوړتیا ده.
د ښاري تخلفاتو د مخنیوي ریاست ټینګار کوي چې د کابل ښار په ټولو ناحیو کې به د نظارت او ارزونې بهیر د ټاکل شوي پلان له مخې دوام ولري او د هر ډول تخلف پر وړاندې به د نافذه قوانینو له مخې لازم قانوني اقدامات ترسره شي.
