د کابل ښار د ماسټر پلان د تطبیق بهیر له نږدې وڅارل شو
۱۴۴۷/۰۱/۱۳
د کابل ښار د ماسټر پلان د پلي کېدو د څرنګوالي ارزونې په موخه، د کور او ښار جوړولو وزارت له ښاري تخلفاتو د مخنیوي ریاست تخنیکي ټیم خپل نظارتي فعالیتونه د ښار د لومړۍ ناحیې له ساحې څخه پیل کړل.
د ښاري سرغړونو د مخنیوي ریاست محترم رئیس مولوي عبدالمنان حقاني وایي، یاد نظارت چې د لومړۍ ناحیې د ریاست له اړوندو مسؤلینو سره د لازمې همغږۍ وروسته ترسره شو، د باغ قاضي، شور بازار او د ابن سینا روغتون شاوخوا سیمې را نغښتې.
ښاغلي مولوي حقاني وویل، د دې نظارت هدف، د ماسټر پلان د موادو دقیق تطبیق، د بې نظمې او غیرقانوني پراختیا مخنیوی او د ښاري جوړښتونو ترمنځ د انسجام او همغږۍ ساتل و.
نوموړي همداراز وویل، د ودانیو د ارتفاعاتو رعایت او د استوګنیزو، سوداګریزو، اداري او خدماتي ساحو د اصولو پلي کېدل په ځانګړي ډول تر ارزونې لاندې ونیول شول.
ښاغلی حقاني ټینګار کوي، چې د ښاري نظم د تامین لپاره به نظارتي بهیر لا جدي، دوامدار او مسلکي شي، او له ښاریانو څخه هم هیله کېږي چې له ښاري اصولو سره سم همکاري وکړي، څو یو منظم، پاک او د ژوند لپاره مناسب ښار ولرو.
