د کابل ښار د ده افغانانو په دوهمه ناحیه کې د دغوچک سیمې سروې او ساحوي مطالعات پیل شول
۱۴۴۸/۳/۱۲
د کور او ښار جوړولو وزارت د زړو ښارونو د ساتنې ریاست تخنیکي ټیم د کابل ښار د دوهمې ناحیې اړوند د ده افغانانو په دغوچک سیمه کې د تاریخي ساحې د سروې او ساحوي مطالعاتو چارې پیل کړې.
یادې سروې او مطالعات د تاریخي او فرهنګي میراثونو د پېژندنې، ثبت او مستند جوړولو او د سیمې د تاریخي ارزښتونو د تثبیت په موخه ترسره کېږي. تخنیکي ټیم هره اوونۍ درې ورځې په ساحه کې حضور مومي او د سروې او مطالعاتو اړوند چارې ترسره کوي.
د سروې په بهیر کې تاریخي ودانۍ، د ځمکو کارونه، کوڅې، سړکونه او نور مهم ښاري او تاریخي عناصر تثبیت او ارزول کېږي. همدارنګه، جغرافیایي موقعیتونه ثبتېږي، له ساحو او تاریخي آبداتو تخنیکي انځورونه اخیستل کېږي او د سیمې له اوسېدونکو څخه د پوښتنلیکونو او حضوري مرکو له لارې د سیمې د تاریخي مخینې، اوسني وضعیت، فرهنګي ارزښتونو او د خلکو نظرونو په اړه معلومات راټولېږي.
د راټولو شوو معلوماتو پر بنسټ به تخصصي او تخنیکي نقشې برابرې او د دغوچک ده افغانانو د تاریخي سیمې د ساتنې او دوامدار مدیریت لپاره به لازمې طرحې او پلانونه چمتو شي.
د یادونې وړ ده چې د کابل ښار د دوهمې ناحیې د اندرابي سیمې سروې او ساحوي مطالعات مخکې بشپړ شوي او د دغوچک ده افغانانو له سروې وروسته به د مرادخاني تاریخي سیمې سروې هم پیل شي. دغه لړۍ به د کاري پلان له مخې په نورو ټاکل شوو تاریخي سیمو کې هم دوام ولري.
