د کابل په خاک جبار ولسوالۍ کې د مهاجرینو د ژوند د ښه والي لپاره پرمختللې سروې ترسره شوه
۱۴۴۷/۹/۵
د کور او ښار جوړولو وزارت د محترم وزیر الحاج مولوي نجیب الله حیات حقاني د حکم له مخې، د دغه وزارت اړوند تخنیکي ټیمونو د مهاجرینو د ژوند خوندیتوب په موخه خپلو هڅو او فعالیتونو ته چټکتیا او دوام ورکړی دی.
دغه وزارت، د کابل په خاک جبار ولسوالۍ کې د مهاجرینو د خوندي، منظمه او باعزته ژوند د پیلولو لپاره د ساحې د سروې چارې ترسره کړې.
یاده سروې د عصري ټکنالوژۍ په کارولو، په ځانګړي ډول د ډرون الوتکو په وسیله ترسره شوه، څو د سیمې دقیق توپوګرافي، حدود او تخنیکي معلومات په دقیقه توګه ثبت او تحلیل شي.
د کور او ښار جوړلوو وزارت محترم وزیر الحاج مولوي نجیب الله حیات حقاني، دغه چاره د مهاجرینو د ژوند د اسانتیا، د ښاري پراختیا لپاره د پلانونو د برابرولو او د راتلونکو پرمختیايي پروژو د عملي کولو لپاره مهم ګام یادوي.
یاده سروې د دې وړتیا برابروي، چې په ښاري پلانونو کې د دقیقو او معیاري معلوماتو پراساس د استوګنې ساحې، عامالمنفعه تأسیسات او نور اړین خدمات په غوره ډول ځای پر ځای شي.
د کور او ښار جوړولو وزارت، خپل مسؤلیت ګڼي چې ورسپارل شوې چارې په غوره او دقیقه توګه سرته ورسوي او درنو هېوادوالو ته د خدمت، ارام ساه اخیستلو او د کار زمینې برابرولو کې خپل رول اداء کړي.
