د کابل په امید سبز ښارګوټي کې د ښاري سرغړونو په موخه ارزونه پیل شوه
۱۴۴۷/۳/۱۸
د کور او ښار جوړولو وزارت، له ښاري سرغړونو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې د کابل په امید سبز ښارګوټي کې د ښاري سرغړونو د مخنیوي په موخه د ارزونې لړۍ پیل کړه.
ښاغلی مولوي حقاني وایي، په پیل کې د ټیم رسمي پېژند پاڼه د شپږمې ناحیې محترم ریاست ته د اړوندو ادارو د همغږۍ لپاره وسپارل شوه، او بیا دغه پېژندپاڼه د امید سبز ښارګوټي د دفتر مسؤلینو ته هم وسپارل شوه.
نوموړی وایي، ټیم ته د ښارګوټو د څېړنې او څارنې په اړه هر اړخیز معلومات وړاندې شوي دي چې ښار له بېلا بېلو برخو لکه سایټ پلان، عام المنفعه، استوګنې او سوداګرۍ، چاپېریال، اوبه رسولو او کانالیزاسيون، برېښنا او نوري فایبر، سړک او ترانسپورت، د ښار حدود او حریم، او جي ای ایس برخو څخه جوړ شوی دی.
محترم مولوي عبدالمنان حقاني وایي، هرې ډلې په خپل اړوند سکتور کې خپلې څارنې او ارزونې پیل کړې دي، چې په خبره یې ساحوي فعالیتونه به دوام وکړي، ترڅو دقیق ارقام او معلومات راټول کړي او د وزارت د منظور شوې نقشې سره د ښارګوټي د واقعیتونو ورته والی وڅاري.
