د ښار جوړولو او ځمکو وزیر د وردګ ولایت سیمهییز پراختیا پلان منظور کړ
د ښار جوړولو او ځمکو وزیر محترم محمود کرزي د وردګ والي ښاغلي عبدالرحمن طارق، د ولایتي شورا رئیس ښاغلي محمد طاهري او د دې ولایت بېلابېلو ادارو رئیسانو په ګډون، د وردګ ولایت سیمهییز پراختیا پلان منظور کړ.
په پیل کې د ښار جوړولو او ځمکو وزیر د ورګ ولایت پراختیا سیمهییز پلان جوړول، د دې ولایت د منظمې پرمختیا په برخه کې کوټلی او حیاتي ګام وباله او زیاته یې کړه چې دا پلان به په دې ولایت کې پرمختیايي او ټولګټو پروژو پلي کېدو او د خلکو په ژوند کې اسانتیا رامنځته کېدو تر څنګ اقتصادي ودې ته هم زمینه برابره کړي.
وروسته د وردګ والي د دې پلان منظورول د وردګ ولایت د پرمختیا لپاره مهم ګام وباله او د ښار جوړولو او ځمکو وزارت له هر اړخیزې پاملرنې او همکارۍ څخه یې مننه او ستاینه وکړه.
د یادولو ده چې سیمهییز پلانونه د ښارونو او لرې پرتو سیمو تر منځ د متوازنې پرمختیا، اقتصادي ودې، په سیمه کې د بېلابېلو بنسټونو پرمختیايي فعالیتونو انسجام، د بېوزلۍ کموالي، د خوندي چاپېریال جوړولو او رامنځته کولو او د خلکو د ژوند کچې لوړولو په موخه جوړېږي.
