د ښار جوړولو او ځمکو سرپرست وزیر د کاپیسا له والي سره وکتل
د ښار جوړولو او ځمکو سرپرست وزیر محترم محمد جواد پیکار د کاپیسا له والي محترم عبدالطیف مراد سره په کتنه کې د ولایت مقام اداري کمپلکس، مېلمستون، احاطې دېوال او د کوهستان لومړۍ حصې ولسوالۍ سټراټیژیک پلان په اړه خبرې وکړې.
په لومړي سر کې د کاپیسا والي محترم عبدالطیف مراد په یاد ولایت کې د ښار جوړولو او ځمکو وزارت له خوا د ساختماني پروژو تطبیق ته د ځانګړې پاملرنې څخه په مننې د پورتنیو پروژو په اړه خپل وړاندیزونه شریک کړل.
وروسته د ښار جوړولو او ځمکو سرپرست وزیر محترم محمد جواد پیکار د ساختماني پروژو تطبیق په برخه کې د کاپیسا د والي ونډه د ستاینې ترڅنګ، د ښاري پروګرام جوړونې عمومي ریاست ته دنده ورکړه چې د کوهستان لومړۍ حصې ولسوالۍ سټراټیژیک پلان دې ژر تر ژره وروستی او د منظوري لپاره چمتو کړي.
نوموړي همدا رنګه د تدارکاتو ریاست ته لارښوونه وکړه چې د کاپیسا ولایت اداري کمپلکس او د هغه احاطوي دېوال تدارکاتي پړاوونه دې چټک کړي او د ولایت او قراردادي شرکت سره په ګډه د یادې پروژې پر وړاندې شته خنډوه لېرې کړي. په ورته وخت کې د تدارکاتو ریاست او د ثبات ټینګښت ملي برنامې هم دنده واخیسته چې د ولایت مېلمستون رغنیزې پروژې چارې دې چټکې کړي.
محترم محمد جواد پیکار د کاپیسا له والي څخه وغوښتل چې د یوه وړاندیز له لارې د مېلمستون لپاره د اوولس جریبه ځمکې د انتقال غوښتنه وکړي، څو د ښار جوړولو او ځمکو وزارت د کابینې تر مصوبې وروسته د هغه د انتقال چارې ترسره کړي.
د ښار جوړولو او ځمکو سرپرست وزیر د محمود راقي ښارګوټي نومرو د وېش په تړاو له والي څخه وغوښتل چې د ځمکو دغه نومرې د یوې کړنلارې له مخې پر اړمنو باندې ووېشل شي.
د کتنې په پای کې دواړو خواوو یو وار بیا د ساختماني پروژو د چارو پر ژر تطبیق ټینګار وکړ.
