د ښاري ځمکو د بیو ټاکلو طرزالعمل یوځای او معیاري شو
۱۴۴۷/۰۳/۱۱
د ښاري ځمکو د بیو ټاکلو د معیاري طرزالعمل د بیاکتنې کمیټې د مسکن، ودانیزو چارو او د برنامو د پراختیا د محترم مرستیال ښاغلي مولوي ګل زرین صابر، په مشرۍ، د یاد طرزالعمل مواد بیا وکتل او یوځای یې کړل.
یاده غونډه، چې د اړوندو ریاستونو د رئیسانو او استازو په ګډون ترسره شوه، په پیل کې ښاغلي حارث اخترزاده، د پروګرام جوړونې او پراختیا عمومي رئیس، په موضوع خبرې وکړې، نوموړي وویل چې اړوندو ریاستونو په تېرو ورځو کې د طرزالعمل مواد بیا کتلي او خپل تخنیکي او حقوقي نظریات یې له کمیټې سره شریک کړي دي.
اخترزاده زیاته کړه چې په دغه طرزالعمل کې د ښاري ځمکو د بیو ټاکلو ټول لازم اصول او معیارونه په پام کې نیول شوي او ښاروالۍ کولای شي د همدې طرزالعمل پر بنسټ د ښاري ځمکو د بیو په ټاکلو کې لازم ګامونه واخلي.
وروسته یو شمېر رئیسانو هم د ښاري ځمکو د بیو ټاکلو د معیارونو په اړه خپلې خبرې وکړې او خپل مثبت نظریات یې وړاندې کړل.
په پای کې ښاغلي مرستیال مولوي صابر ټینګار وکړ، چې د ځمکو د بیو ټاکلو معیارونه باید هر اړخیز او ټول شموله وي، نوموړي زیاته کړه چې وروستی شوی طرزالعمل دې د لا نورو پرېکړو لپاره په رسمي ډول د وزارت محترم مقام ته ولېږل شي.
د یادولو ده چې د کور او ښار جوړولو وزارت مشرتابه تازه د مسکن، ودانیزو چارو او دبرنامو د پراختیا محترم معینیت ته دنده سپارلې وه څو د یاد طرزالعمل د لا پیاوړتیا لپاره بیاکتنه وکړي او وروستی راپور وړاندې کړي.
