د هرات جامع جومات د بیا رغونې له چارو څارنه وشوه
۱۴۴۷/۰۵/۱۲
د هرات ولایت د کور او ښار جوړولو ریاست محترم رئیس انجنیر عبدالله اکبري وایي، د دې ریاست تخنیکي ټیم د تاریخي ابداتو د ساتنې آمریت، د اطلاعات او فرهنګ ریاست د حکم پر اساس، د هرات د جامع جومات او شاوخوا تاریخي ودانیو د بیارغونې چارې له نږدې وڅارلې.
انجنیر اکبري زیاته کړه، پلې لارو د تیږو ایښودنې کارونو جریان در لود، او د قراردادي شرکت مسؤل ته سپارښتنه وشوه چې، د موادو د مارک مراعات، د ژورنال کتابچه ساتل، د پیمانې (منک) شتون، او د ساحې د خوندیتوب مقرراتو رعایت حتمي دي.
د نوموړي په خبره، د جامع جومات د شمالي ایوان د چت مرمتي کارونه چې شاوخوا ۱۵ متره لوړوالی لري، هم روان دي. همدارنګه د جومات د جنوب لوېدیځ اړخ د خښتو او ګچ کارونه بشپړ شوي، او تر اوسه ۱۷ چتونه هنگافکاري شوي دي.
انجنیر اکبري وویل چې د منار یادګار د تهداب د بیارغونې چارې د سنتي خښتو په کارولو سره پیل شوې دي. د دغه منار د تهداب ډبرینې برخې یو شمېر ځایونه مخکې تخریب شوي وو.
د کور او ښار جوړولو ریاست د مسؤلینو په وینا، د هرات د تاریخي جوماتونو او آبداتو د مرمت او ساتنې چارې د فرهنګي میراث د خوندي ساتلو په هدف په دوامداره ډول تعقیبېږي.
