د نیمروز په زرنج ښار کې د ښاري پلانونو د ساحو د ارزونې بهیر دوام لري او یو لړ سرغړونې موندل شوې دي
۱۴۴۷/۹/۸
د کور او ښار جوړولو وزارت، له ښاري سرغړونو د مخنیوي او د پروژو پر تطبیق د څار محترم عمومي ریاست په همغږۍ د دغه وزارت د ښاري تخلفاتو د مخنیوي محترم ریاست تخنیکي ټیم په نیمروز ولایت کې خپلو هڅو او فعالیتونو په دوام کې، یو لړ سرغړونې موندلې او د مخنیوي هڅې یې پیل کړي دي.
د موندنو په ترڅ کې معلومه شوې چې ځینې کورونه په خدماتي ساحو او ان د دوه طرفه سړک پر مسیر جوړ شوي او ټاکل شوی سړک د استوګنیزو کورونو په ساحه بدل شوی.
دغه راز، یو شمېر استوګنیزې نمرې د ښاروالۍ له لوري په قراردادونو سره سوداګریزو هټیو ته اوښتي او رغنیزې چارې یې روانې دي.
سربېره پر دې، ورزشي سټېډیوم د شنو او خدماتي ساحو په محدوده کې موقعیت لري او ځینې تفریحي شنې ساحې په استوګنیزو کورونو بدلې شوې دي.
په ټوله کې، د زرنج ښار په دواړو منظور شوو پلانونو کې د شنو، تفریحي او خدماتي فضاوو لویه برخه استوګنیزو کورونو، تجارتي ودانیو، دولتي تاسیساتو او نورو فعالیتونو ته بدل شوي دي.
دا بهیر نه یوازې د ښار شنې او عامه تفریحي فضاوې کموي، بلکې د ښاري نظم، چاپېریالي توازن او راتلونکي انکشافي جوړښت ته هم جدي زیان اړوي.
یاد تخنیکي پلاوی به خپلې موندنې او وړاندیزونه د کور او ښار جوړولو وزارت له محترم مقام سره شریکې کړي، څو د قانوني اقداماتو او لازمو اصلاحاتو په اړه اړین صمیم ونیول شي.
