د نوي کابل ښار لومړي فاز الف پارسل انکشافي پلان جوړ شو
۱۴۴۶/۰۸/ ۰۹
نوی کابل ښار چې د اوسني کابل ښار بدیل او په شاوخوا درې سوه او اویا زره (370000) جریبه ځمکه کې جوړېږي، چارې یې ورځ تر بلې د پرمختګ په حال کې دي.
دهېواد په کچه دغه ستره ملي پروژه چې، د سیمې په کچه او په ښاري معیارونو برابره جوړېږي، په کې د پانګونې لپاره شرایط برابر دي.
د کور او ښار جوړولو وزارت محترم سرپرست وزیر الحاج شیخ حمدالله نعماني د نوي کابل ښار لومړي فاز الف پارسل پراختیایي پلان ویزه کړ.
تمه ده چې، د دغه پلان تر ویزه کېدو وروسته به په نږدې راتلونکي کې د دغه ښار د لومړي فاز الف پارسل چارې لا پراخه او ګړندۍ شي.
یاد پارسل ته پراختیا ورکوونکي شرکت ویلي، د پلان تر ویزه کېدو وروسته به خپلې چارې په معیار برابرې چتکې کړي.
د کور او ښار جوړولو وزارت هڅې کوي چې، په اوسني کابل ښار کې د اسانتیاوو رامنځته کولو او هېوادوالو ته د معیاري ښاري خدماتو وړاندې کولو په موخه د نوي کابل ښار چارې چټکې کړي.
