د ننګرهار ولایت، په رودات ولسوالۍ کې د مهاجرینو لپاره د استوګنیز ښارګوټي پرانیسته او د نمرو وېش پیل شو
۱۴۴۷/۱۱/۱۸
د کور او ښار جوړولو وزارت د محترم وزیر الحاج مولوي نجیب الله حیات حقاني له لوري له لوري د ننګرهار ولایت په رودات ولسوالۍ کې د امير المٶمنين په نوم د مهاجرینو لپاره په شاوخوا (۱۸۰۰۰) اتلس زره جریبه ځمکه کې د استوګنیز ښارګوټي د پرانیستې او د استوګنې نمرو د وېش مراسم ترسره شول.
په دې مراسمو کې د کور او ښار جوړولو محترم وزیر الحاج مولوي نجیب الله حیات حقاني، د ننګرهار والي حاجي ملا محمد نعیم اخوند، د دایمي مشتیدنې او د ځمکو د ویش کمیټې محترمو غړو د او ګڼ شمېر راستنېدونکو کورنیو ګډون کړی وو.
محترم وزیر الحاج مولوي نجیب الله حیات حفاني په خپلو خبرو کې راستنېدونکو هېوادوالو ته ډاډ ورکړ چې اسلامي امارت ژمن دی څو هرې راستنېدونکې کورنۍ ته د استوګنې لپاره ځمکه په عادلانه او منظم ډول ووېشي.
نوموړي زیاته کړه چې د مهاجرینو د ستونزو حل او د باعزته ژوند زمینې برابرول د اسلامي امارت له اساسي لومړیتوبونو څخه دي.
نوموړي له ګاونډیو هېوادونو وغوښتل چې له افغان مهاجرو سره د انساني او اسلامي اصولو پر بنسټ چلند وکړي، او په هېواد دننه یې له شتمنو او خیرخوا هېوادوالو وغوښتل چې د راستنېدونکو کورنیو ملاتړ او لاسنیوی وکړي.
همداراز، د ننګرهار محترم والي حاجي ملا محمد نعیم اخوند په خپلو خبرو کې وویل چې د مهاجرینو لپاره د استوګنې دایمي حل د وخت اړتیا ده او هڅې روانې دي څو راستنېدونکو ته د منظم ژوند اسانتیاوې برابرې شي.
نوموړي ټینګار وکړ چې اړوندې ادارې باید د خدمتونو وړاندې کولو په برخه کې لا زیات همغږي او چټکتیا رامنځته کړي.
د کور او ښار جوړولو وزیر خپلو کارکوونکو ته لارښوونه وکړه چې د چارو په چټکتیا کې جدي پاملرنه وکړي او د مؤثر مدیریت له لارې د پروژو عملي بهیر ګړندی کړي، تر څو د ښارګوټو د ابادۍ چارې په ټاکلي وخت بشپړې شي.
د یادولو وړ ده چې د کور او ښار جوړولو محترم وزیر له تېرو لسو ورځو راهیسې ختیځ زون کې په کاري سفر بوخت دی، چې په ترڅ کې یې د ننګرهار او لغمان ولایتونو په بېلابېلو سیمو کې په زرګونو جریبه ځمکې د استوګنیزو ښارګوټو لپاره ځانګړې شوې او د ځینو نورو ښارګوټو د جوړېدو لپاره د تخنیکي سروې او خطاچونې چارې روانې دي.
په دغه لړ کې، د ښارګوټو پرانیستې او د نمرو وېش بهیر په دوامداره توګه روان دی، تر څو راستنېدونکو هېوادوالو ته دایمي سرپناه او د ژوند مناسب شرایط برابر شي.
