د لغمان ولایت په دولت شاه ولسوالۍ کې د روغتیایي کلینیک له ودانیزو چارو څارنه وشوه
۱۴۴۷/۰۱/۱۷
د لغمان ولایت د کور او ښار جوړولو ریاست محترم رئیس مولوي حسین احمد تېلوي وایي، اړوند فني او مسلکي ټیم یې، په دغه ولایت کې د عامې روغتیا ریاست له استازو او یو شمېر نورو اړوندو ادارو سره یو ځای، د دولت شاه ولسوالۍ د ګډیالي کلي د روغتیایي کلینیک له ودانیزې پروژې تخنیکي څارنه وکړه.
ښاغلی مولوي تېلوي وایي، یاد ټیم د ساحې د معاینې پر مهال څرګنده کړه، چې دا مهال د احاطوي دېوال د رنګمالۍ کارونه روان دي، او همداراز د ودانۍ د داخلي او خارجي برخو د رنګمالۍ ترڅنګ، د اوبو رسولو اړوند وسایلو نصب بهیر هم دوام لري.
نوموړی وایي، د څارنې ټیم د ساختماني شرکت مسؤل انجنیر ته جدي سپارښتنه وکړه، چې ټول کارونه باید د منظور شوې نقشې، تخنیکي مشخصاتو (احجامو)، او ساختماني نورمونو مطابق تطبیق شي، تر څو د پروژې کیفیت وساتل شي او دا کلینیک په معیاري ډول ګټې اخیستنې ته وسپارل شي.
د کور او ښار جوړولو وزارت ډاډ ورکوي، چې د عامه ودانیو د کیفیت، دوام او د خلکو لپاره د اسانتیاوو رامنځته کولو په موخه به ورته څارنیزې لیدنې دوام ولري.
