د جلالاباد ښار لومړۍ ناحیه کې د ښاري اصولو خلاف فعالیتونه تثبیت شول
۱۴۴۷/۱۲/۰۶
د ننګرهار ولایت د کور او ښار جوړولو ریاست د ښاري تخلفاتو د مخنیوي تخنیکي ټیم، د دوامدارو نظارتي پروګرامونو په لړ کې د جلالاباد ښار لومړۍ ناحیې اړوند د شیرزي لوبغالي ترڅنګ له هغې ساحې څخه تخنیکي او ساحوي لیدنه ترسره کړه، چې د ښار د ماسټر پلان له مخې د شنې ساحې په توګه تثبیت شوې ده.
د ساحوي څارنې پر مهال څرګنده شوه، چې یاده شنه ساحه د یوه شخص له لوري په قرارداد نیول شوې او په ساحه کې د موټرو هډې فعالیتونه او ځینې ساختماني چارې روانې دي، چې دا فعالیتونه د نافذه قوانینو، منظور شوو ښاري پلانونو او د شنو ساحو د ساتنې له اصولو سره په ټکر کې ګڼل کېږي.
د معلوماتو له مخې، د ښاري تخلفاتو د مخنیوي تخنیکي ټیم له لوري یاده موضوع په ابتدایي ډول تثبیت او ثبت شوې او ټاکل شوې ده، چې په دې اړه د ننګرهار ولایت مقام او د ننګرهار ښاروالۍ ته رسمي معلومات وړاندې شي، څو د یادو غیرقانوني فعالیتونو د مخنیوي، د شنې ساحې د حفاظت او د ماسټر پلان د تطبیق په موخه لازم قانوني اقدامات ترسره شي.
د شنو ساحو ساتنه د ښاري نظم، چاپېریالي توازن، د ښار ښکلا او سالم ښاري ژوند لپاره حیاتي ارزښت لري او د دغو ساحو هر ډول غیرقانوني استفاده د ښاري اصولو او مقرراتو خلاف عمل ګڼل کېږي.
د دغو څارنو اساسي موخه د ښار د ماسټر پلان تطبیق، د شنو ساحو ساتنه، د غیرقانوني ساختماني او تجارتي فعالیتونو مخنیوی، د ښاري نظم تأمین او د سالم ښاري مدیریت پیاوړتیا یاد شوې ده.
