د نوي کابل ښار په لومړي فاز کې د ام ـ اې (۰۴) سړک د جوړولو چارې روانې دي
۱۴۴۸/۴/۲۳
د کور او ښار جوړولو وزارت اړوند د نوي کابل ښار د پراختیا عمومي ریاست تر مدیریت او تخنیکي څارنې لاندې، د نوي کابل ښار په لومړي فاز کې د ام ـ اې (۰۴) سړک د جوړولو چارې په چټکۍ سره روانې دي.
یاد سړک ۳۳ متره پلنوالی او له ۱.۵ کیلومترو څخه زیات اوږدوالی لري، چې د ښاري تګ راتګ د اسانتیا او د ترانسپورتي ظرفیت د لوړولو په موخه د چټک بس ترانسپورتي سیستم لپاره هم لازمې اسانتیاوې په پام کې نیول شوې دي.
د پروژې په لړ کې د سړک د ځمکې د کیندنې او د ویالو د جوړولو چارې بشپړې شوې دي. اوس مهال د سړک د لاندې طبقې د ځمکې د ټینګولو او د ویالو د پیاوړتیا لپاره د ځانګړو کانکریټو اچولو چارې روانې دي.
د نوي کابل ښار د پراختیا عمومي ریاست تخنیکي معاونیت او اجرائیوي مسؤلین د پروژې د عملي چارو بهیر له نږدې څاري، څو د سړک د جوړولو ټول فعالیتونه د منظور شوي پلان او ټاکل شوو تخنیکي معیارونو سره سم ترسره شي.
د ام ـ اې (۰۴) سړک په بشپړېدو سره به د نوي کابل ښار د اوسنیو او راتلونکو پراختیايي سیمو لپاره د تګراتګ او ترانسپورتي خدمتونو اسانتیاوې پراخې او د ښار د ترانسپورتي شبکې په پیاوړتیا کې به مهم رول ولري.
