د دایکندي ولایت د القان ولسوالۍ د سوداګریز بازار د پراختیا پلان طرحه او ترتیب شو
۱۴۴۸/۲/۱۷
د کور او ښار جوړولو وزارت د محترم وزیر الحاج مولوي نجیب الله حیات حقاني د لارښوونې او د ښاري پراختیايي اړتیاوو د ارزونې پر بنسټ، د دایکندي ولایت د القان ولسوالۍ د سوداګریز بازار د پراختیا او سمون پلان د وزارت د تخنیکي ټیم له لوري ترتیب او طرحه شو.
دغه پلان د کور او ښار جوړولو وزارت د انجینري ټیم له خوا د سیمې له سروې، تخنیکي مطالعاتو او ښاري ارزونو وروسته جوړ شوی، چې موخه یې د سوداګریزو فعالیتونو د ودې، د ښاري نظم رامنځته کول او د سیمې د اوسېدونکو لپاره د مناسبې استوګنې او اقتصادي فعالیتونو زمینه برابرول دي.
د القان ولسوالۍ د مرکز لپاره جوړ شوی دغه ښاري پلان د ۱۴۰ جریبه ځمکې په مساحت کې طرحه شوی، چې د ښاري معیارونو او تخنیکي اصولو له مخې پکې ۱۴ استوګنیزې نمرې او ۱۴۵ سوداګریزې څو پوړیزې نمرې په پام کې نیول شوې دي.
د یاد پلان په پلي کېدو سره به د سیمې د سوداګریزو فعالیتونو د پراختیا، د ښاري خدمتونو د ښه تنظیم او د اقتصادي ودې لپاره زمینه برابره شي. همدارنګه، هر کال به شاوخوا ۲۵ زره کسان له دې پروژې څخه ګټه واخلي.
د یادونې وړ ده چې د دغه پلان د سروې، طرحې، ترسیم او تخنیکي ارزونې چارې د کور او ښار جوړولو وزارت د متخصصو انجینرانو له لوري د ښاري قوانینو او تخنیکي معیارونو له مخې ترسره شوې دي.
د کور او ښار جوړولو وزارت د ښاري پلانونو د طرحې او پراختیا له لارې هڅه کوي، څو د هېواد په بېلابېلو ولایتونو کې د ښارونو د متوازن او دوامدار پرمختګ لپاره لازم بنسټونه برابر او هېوادوالو ته د مناسبې استوګنې او اقتصادي فعالیتونو زمینه مساعده کړي.
