د کابل ښار د اوولسمې ناحیې د خیرخانې کوتل سر په سیمه کې د شنو ساحاتو او ښاري سرغړونو له وضعیت څخه نظارت ترسره شو
۱۴۴۸/۱/۱۶
د کور او ښار جوړولو وزارت د کیفیت کنټرول او د ښاري سرغړونو ته د رسېدنې لوی ریاست اړوند د ښاري سرغړونو د مخنیوي ریاست تخنیکي ټیم د منظم او دوامداره نظارتي برنامو په لړ کې د کابل ښار د اوولسمې ناحیې د خیرخانې کوتل سر په سیمه کې ساحوي نظارت ترسره کړ.
د نظارت پر مهال یاده سیمه، په ځانګړې توګه د سرک د شنو ساحاتو او حریمونو وضعیت له نږدې وڅېړل شو.
د تخنیکي ټیم د موندنو له مخې، په ځینو برخو کې د سرک د شنو ساحاتو د حریم د تصرف او د تجارتي فعالیتونو د پراختیا نښې لیدل شوې، چې د نافذه ښاري اصولو او مقرراتو سره په ټکر کې دي.
تخنیکي ټیم مخکې هم څو ځله له یادې ساحې څخه نظارت ترسره کړی و او اړوندو مالکینو او د دوکانونو او غرفو مسؤلینو ته لازمې سپارښتنې ورکړل شوې وې، ترڅو د سرک په حریم او شنو ساحاتو کې ټول تجارتي فعالیتونه ودرول شي او د ښاري سرغړونو مخه ونیول شي، څو په دې اړه وروستۍ پرېکړه د محترم مقام له لوري وشي.
خو د وروستیو څارنو له مخې څرګنده شوه چې ځینو متخلفو اشخاصو یو ځل بیا خپل تجارتي فعالیتونه پیل کړي دي، چې له همدې امله د یاد ریاست تخنیکي ټیم د سرغړونو د مخنیوي په موخه ساحه وارزوله او د ځینو غیرقانوني دوکانونو، کانټینرونو، مستري ګریو او د لرګیو پلورونکو غرفو فعالیتونه یې ودرول او مهرلاک کړل.
همدارنګه د میوه پلورونکو مسؤلینو ته جدي سپارښتنه وشوه چې خپل فعالیتونه ژر تر ژره ودروي.
یاد نظارت د کور او ښار جوړولو وزارت د هدایت له مخې ترسره شو، څو ډاډ ترلاسه شي چې د ښار جوړونې قوانین، مقررات او تخنیکي اصول په بشپړ ډول رعایت شي او د ښاري سرغړونو د پراختیا مخه ونیول شي، ترڅو د ښار د منظم او همغږي پرمختګ زمینه برابره شي.
