په خوست کې راستنېدونکو مهاجرینولپاره د ښارګوټي د خط اچونې چارې پیل شوې
۱۴۴۷/۱۱/۲۰
د خوست ولایت مرکز اړوند د صحرا باغ سیمه کې، بېرته راستنېدونکو کډوالو ته د استوګنیزو نمرو د تثبیت او منظم وېش په موخه د ښارګوټي د خط اچونې چارې پیل شوې.
دغه ښارګوټی په شاوخوا ۱۳۰۰ جریبه ځمکه کې جوړېږي، چې پکې ۱۶۸۳ استوګنیزې نمرې په پام کې نیول شوې دي.
د ښارګوټي په طرحه کې د استوګنیزو نمرو ترڅنګ مهم بنسټیز او عامه تأسیسات لکه سوداګریز مارکېټونه، سړکونه، پلې لارې، د اوبو ویالې، شنې ساحې، د موټرو تمځای، مدرسې، جوماتونه او ښوونځي هم شامل دي، څو راستنېدونکو کورنیو ته د ژوند مناسب او منظم چاپېریال برابر شي.
د راستنېدونکو کډوالو لپاره د معیاري ښارګوټو جوړول د کور او ښار جوړولو وزارت له مهمو پروګرامونو څخه شمېرل کېږي، چې موخه یې د منظمې استوګنې برابرول او د ښاري اسانتیاوو معیاري پراختیا ده.
