د سرپل ولایت د کوهستانات ولسوالۍ د جرجرک کلي د پلچک پروژې څارنه ترسره شوه
۱۴۴۷/۷/۴
د سرپل ولایت د کور او ښار جوړولو ریاست د تخنیکي ټیم له لوري، د کوهستانات ولسوالۍ د جرجرک کلي د پلچک د پروژې د اجرايي چارو څارنه ترسره شوه.
د څارنې پر مهال څرګنده شوه چې د پلچک د تهدابونو ډبرې او د پل د سر ځینې برخو د وتلو اړخونه بشپړ شوي دي، چې د نقشې د غوښتنې سره سم باید په مایل بڼه ترسره شوي وی، خو د ناظر انجینر او اړوند سکتور د لارښوونې له مخې په عمودي بڼه عملي شوی دی.
همدارنګه، د پلچک د رینګونو او سلب قالب بندي او سیخ بندي بشپړ شوې او پروژه د کانکریټ اچونې لپاره چمتو ده، چې قراردادي شرکت ته لارښوونه وشوه چې د هوا د مناسبو شرایطو سره سره، د کانکریټ پر مهال د یخ ضد مواد وکاروي او د کانکریټ تر اچولو وروسته لازم تدابیر هم په پام کې ونیسي.
د کور او ښار جوړولو وزارت د هېواد په بېلابېلو ولایتونو کې د زیربنایي او پراختیايي پروژو د معیاري تطبیق، د ودانیزو معیارونو د مراعات او د کیفیت د تضمین په موخه د پروژو تخنیکي څارنه ترسره کوي، تر څو ټولې پروژې د منظور شوو نقشو، تخنیکي اصولو او نافذه مقرراتو سره سم عملي شي.
