د هرات ولایت د صنعتي ښارګوټي د دویمې مرحلې د سړک له قیر چارو څارنه وشوه
۱۴۴۷/۰۱/۱۴
هرات ولایت کې د کور او ښار جوړولو ریاست محترم رئیس انجنیر عبدالله اکبري وایي، د ریاست اړوند تخنیکي او مسلکي ټیم یې، په دغه ولایت کې، د صنعتي ښارګوټي د دویمې مرحلې د سړک له قیر چارو څارنه وکړه.
ښاغلی انجنیر اکبري وایي، دا څارنه د هرات محترمې ښاروالۍ د وړاندیز او د ولایت د محترم مقام د حکم په اساس ترسره شوه.
نوموړی وایي، د څارنې په مهال معلومه شوه، چې د سړک د قیر چارې اوسمهال د سب بېس په مرحله کې روانې دي.
ښاغلی رئیس وایي، د پروژې ناظرینو په حضور کې د قیر اړوند اړین ټسټونه ترسره شول، او د بېس کورس موادو نمونه اخیستل شوې چې د میکس ډیزاین د ازموینې لپاره لابراتوار ته ولېږل شوه.
انجنیر اکبري وایي، د شرکت اجرائیوي ټیم ته لازمې او اړینې سپارښتنې وشوې، چې د پروژې د کار په مهال د کار کوونکو د خونديتوب تدابیر په جدي توګه رعایت شي، او ټول کاري پړاوونه د کار د احجامو او BOQ د معیارونو سره سم پرمخ یوړل شي.
دا څارنه د هرات ولایت په صنعتي ښارګوټي کې د ښاري پرمختګ د معیارونو د ټینګښت په موخه دوام لري.
