پکتیا ولایت کې د شاوخوا شپېته ودانیزو پروژو سروې پیل شوه
۱۴۴۶/۰۶/۱۷
پکتیا ولایت کې د کور او ښار جوړولو ریاست محترم رئیس مولوي عبیدالله رشاد وایي، د پکتیا ولایت د سرحدي ولسوالیو لپاره (۶۱) بېلا بېلې پروژې منظور شوي، چې ګام په ګام به یې سروې ترسره شي.
ښاغلی مولوي رشاد وایي، د پکتيا ولايت لپاره د اړتیا له مخې، د مرکزې کميټې له خوا (۶۱) ودانیزې پروژې د اغيزمنتوب، ګټې او نورو مواردو ته په پام منظورې شوې دي.
نوموړی وایي، له ډلې یې دوی د لومړي ځل لپاره د ډیورنډ فرضي کرښې ته څېرمه ډنډې پټان ولسوالۍ کې د نري کنډو سړک د جوړولو سروې چارې پيل کړې.
نوموړی زیاتوي، د نري کنډو سړک د پکتيا ولايت د ډنډې پټان ولسوالۍ او د خوست ولايت د ځاځي ميدان ولسوالۍ سره نښلوي، چې ياد سړک په رغولو سره به د سيمو خلکو او مسافرو ته ګڼې اسانتیاوې برابرې شي.
د یادولو وړ یې بولو، چې د کور او ښار جوړولو ریاست او په پکتیا ولایت کې مېشت يو شمېر نورو ریاستونو ته دندې سپارل شوي، چې په فرضي کرښې ته څېرمه سیمو کې د روغتيا، تعليم، مخابراتو، مساجدو، کليو بيا رغونې، اوبو، سړکونو او نورو برخو کې د خلکو اړتیاوې تثبيت او د حل په موخه یې چارې پیل کړي.
