هڅه کوو چې د ټولو پراختیایي پروژو ستونزې حل او د تخریب مخه یې ونیول شي
۱۴۴۳/۰۹/۰۴
د ښار جوړولو او ځمکو وزارت سرپرست محترم مولوي حمد الله نعماني د ملي پراختیا شرکت له مسؤلینو سره وکتل او د یو شمېر پروژو د برخلیک په اړه یې خبرې وکړې.
په پیل کې د ملي پراختیا شرکت مسؤلینو د خپلو پروژو په اړه بشپړ معلومات وړاندې کړل چې څومره بشپړې شوې او څومره یې نیمګړي پاتې دي او په کومو ولایتونو کې موقعیت لري.
دوی زیاته کړه چې د یادو پروژو له درکه یې د ښار جوړولو او ځمکو وزارت پوروړی دی چې باید پور یې هم ورکړل شي.
ورپسې د ښار جوړولو او ځمکو وزارت سرپرست محترم مولوي حمد الله نعماني د ټولو هغه پروژو د برخلیک معلومولو په اړه خبرې وکړې چې د تېر حکومت په مهال پیل شوې وې.
ښاغلي وزیر مولوي حمد الله نعماني وویل، هڅه کوي چې د ټولو پراختیایي پروژو ستونزې حل او د تخریب مخه یې ونیول شي او سالمه ګټه ترې واخیستل شي.
نوموړي زیاته کړه چې په دې اړه به د ټولو پروژو له مسؤلینو سره هر اړخیزې خبرې اترې وکړي او د یوې طرحې له مخې به یې برخلیک معلوم کړي.
