ښار جوړولو او ځمکو وزارت سرپرست وزیر د پکتیا له والي سره وکتل
ښار جوړولو او ځمکو وزارت سرپرست وزیر محترم محمود کرزی د پکتیا له والي محترم محمد حلیم فدایي سره وکتل او په پکتیا ولایت کې د پراختیایي او ټولګټو پروژو د تطبیق پر څرنګوالي خبرې وکړې.
په سر کې، د پکتیا والي په یاد ولایت کې د ښاري پراختیا او د ځمکوالۍ چارو تنظیم په برخه کې د ښار جوړولو او ځمکو وزارت هڅې وستایلې او زیاته یې کړه چې په دې ولایت کې اقتصادي ودې او ټولنیزې هوساینې لپاره ډېر کار ته اړتیا شته. محترم محمد حلیم فدایي له ښار جوړولو او ځمکو وزارت څخه وغوښتل ترڅو د ټولګټو پروژو په تطبیق کې یاد ولایت ته ځانګړې پاملرنه وکړي.
ورپسې، د ښار جوړولو او ځمکو وزارت سرپرست وزیر محترم محمود کرزی وویل چې د دولتي ځمکو د سمې استفادې له لارې هڅه کوو ټولګټو پروژو تطبیق ته زمینه برابره شي. محترم محمود کرزی پکتیا ولایت یې د دې وزارت لپاره یو له مهمو ولایتونو وباله او زیاته یې کړه چې په ګډ کار سره د دې ولایت د اقتصادي ودې او ټولنیزې هوساینې لپاره اړین اقدامات ترسره کیدای شي.
محترم محمود کرزی، د ښاري انکشاف او ښارګوټو د جوړونې لپاره د پکتیا له والي وغوښتل ترڅو مشخص وړاندیزونه دې ښار جوړولو او ځمکو وزارت ته واستوي او دا وزارت د ولایت د وړاندیزونو سره سم هر راز همکاري ته چمتو دی.
همدارنګه، ښار جوړولو او ځمکو وزارت سرپرست وزیر د پکتیا له والي وغوښتل پانګوال وهڅوي ترڅو په یاد ولایت کې د ټولګټو پروژو د تطبیق لپاره اړین فرصتونه برابر شي.
###
