په نېش ولسوالۍ کې د چېکډیم، کانال او سربند د په ټپه ولاړو چارو د بېرته پیلولو لپاره لارښوونې وشوې
۱۴۴۵/۷/۱۷
د کندهار ولایت د کور او ښار جوړولو محترم رئیس مولوي عبدالمتین عاشق وایي، د دې ریاست اړوند تخنیکي ټیم د یوه هیئت په ملتیا د کندهار نېش ولسوالۍ د چېکډیم، کانال او سربند له رغنیزو چارو څارنه وکړه.
مولوي عبدالمتین وایي، د کندهار ولایت د محترم مقام د هدایت پر اساس، د کور او ښار جوړولو ریاست انجنیرانو د ټاکل شوې کمېټې سره یو ځای د نېش ولسوالۍ د چېکډیم، کانال او سربند سیمه له نږدې وکتله، تر څو د یاد بند رغنیزې چارې د کرنې، مالدارۍ او اوبو محترم ریاست د نقشې او ډیزاین مطابق مخکې لاړې شي.
هغه وایي، دمګړۍ د یاد بند رغنیزې چارې د کانال د نامعلوم مسیر، د سربند شاوخوا ځمکو د تخریب او د نقشې او ډیزاین خلاف رغولو له امله په ټپه ولاړې دي.
