په بلخ کې د مهاجرینو ښارګوټي د خطاندازۍ چارې په چټکۍ سره روانې دي
۱۴۴۷/۰۳/۲۵
د کور او ښار جوړولو وزارت د سروې اوجي اي اېس ریاست محترم رئیس حافظ انجنیر محمد یوسف لطیف وایي چې د دې ریاست اړوند تخنیکي ټیم د بلخ ولایت د کور او ښار جوړولو ریاست په همکارۍ د مهاجرینو ښارګوټي د خط اچونې چارې په چټکۍ سره پر مخ وړي.
نوموړي زیاته کړه چې د یادې پروژې عملي کارونه د تخنیکي اصولو او نقشو سره سم پرمخ ځي او هڅه کېږي چې د ښارګوټي د نقشه بردارۍ او خط اچونې ټول پړاوونه په ټاکلي وخت کې بشپړ شي.
د کور او ښار جوړولو وزارت د سروې اوجي اي اېس ریاست په مرسته په هېواد کې د ښاري پراختیايي پروژو د نقشې، خط اچونې او پلان جوړونې چارې پرمخ وړي، چې د مهاجرینو لپاره د منظم ښارګوټو جوړول د وزارت له مهمو پروګرامونو څخه دی چې موخه یې د غیرپلاني سیمو د پراختیا مخنیوی، د ښاري خدمتونو وړاندې کول او د خلکو لپاره د معیاري استوګنې زمینه برابرول دي.
