ننګرهار کې د مهاجرینو د ښارګوټي لپاره د توپوګرافي سروې ترسره شوه
۱۴۴۷/۳/۱۵
د کور او ښار جوړولو وزارت، د سروې او جي ای ایس ریاست محترم رئیس حافظ انجنیر محمد یوسف لطیف وایي، د ریاست اړوند تخنیکي ټیم یې د ننګرهار ولایت په رودات ولسوالۍ کې د مهاجرینو د ښارګوټي توپوګرافي سروې ترسره کړه.
ښاغلی حافظ لطیف وایي، د ننګرهار ولایت د رودات ولسوالۍ په اړوند سیمه کې د مهاجرینو د ښارک د جوړولو لپاره د ۱۸۱۸۹ جریب ځمکې توپوګرافیکه سروې په بریالیتوب سره ترسره شوه.
نوموړی وایي، دغه سروې د ځمکې دقیقو جغرافیایي ځانګړتیاوو، ارتفاعاتو، او نورو فزیکي ځانګړتیاوو د معلومولو په موخه په بشپړه شوه.
د دې پروژې موخه دا ده چې د مهاجرینو لپاره یو منظم، خوندي، او پرمختللی ښارګوټی جوړ شي، چې په کې د ژوند ټولې بنسټیزې اسانتیاوې لکه کورونه، تعلیمي مرکزونه، روغتیایي خدمتونه، او نور عامه تاسیسات ځای پر ځای شي.
د کور او ښار جوړولو وزارت هڅې پیل کړي، چې د مهاجرینو د ژوند د معیار د لوړولو په برخه کې مهم او اغېزمن ګامونه پورته کړي.
