محترم محمد جواد پیکار د ښرنې سټراټیژیک اصلاحي انکشافي پلان منظور کړ
د ښار جوړولو او ځمکو سرپرست وزیر محترم محمد جواد پیکار د پکتیکا والي محترم مجیب الرحمان څمکني او د ښرنې ښاروال محترم عبدالکریم ځدران سره په کتنه کې په یاد ولایت کې پر پراختیايي مسایلو خبرې اترې وکړې.
په لومړي سر کې د پکتیکا والي د ښرنې ماسټر پلان او د ارګون تفصیلي پلان چارو د چټکتیکا غوښتنې ترڅنګ، دغه ولایت ته د شخصي او دولتي ځمکو او ملکیتونو د تصفیې په هدف د یوه پلاوي د ورلېږلو غوښتنه وکړه.
ورپسې د ښار جوړولو او ځمکو سرپرست وزیر وویل، د ارګون تفصیلي پلان شاوخوا ۹۰ سلنه چارې بشپړې شوي او د ښاري پروګرام جوړونې عمومي ریاست ته یې دنده وسپارله چې په لنډ وخت کې دې منظوري لپاره چمتو کړي.
محترم محمد جواد پیکار همدا رنگه د پکتیکا والي په ځواب کې وویل، د جلالتمآب جمهور رئیس لارښوونې سره سم، د غصب پر وړاندې مبارزه په چټکه توګه روانه ده او د تصفیې عمومي ریاست ته یې دنده وسپارله چې ژر تر ژره دې د تصفیې یو پلاوی هغه ولایت ته ور ولیږي، څو د تصفیې له لارې دولتي او شخصي ځمکې او ملکیتونه تفکیک او د ورسره د غصب مخنیوی وشي.
د ښار جوړولو او ځمکو سرپرست وزیر همدا راز اړوندو برخو ته دنده ورکړه چې په ښرنه کې د کډوالو، معلولینو او ښوونکیو ښارګوټو خط اندازۍ لپاره دې درې کسیزه پلاوی هغه ولایت ته واستوي، څو په اړمنو باندې د وېش رسمي لړۍ پیل شي.
نوموړي همدا راز وویل، یاد پلاوی دې په ښرنه کې د امنیتي او دفاعي ځواکونو شهیدو سرتېرو کورنیو ته د یوه ښارګوټي سروې چارې هم ترسره کړي.
محترم محمد جواد پیکار د دغې کتنې په پای کې د پکتیکا ولایت مرکز د ښرنې ښار سټراټیژیک اصلاحي انکشافي پلان هم منظور کړ.
په دغه پلان کې د پوهنتون ساحه له ۱۶۰ جریبو څخه ۲۵۰ جریبو ته پراخه شوې، د شهیدانو کورنیو او کډوالو ته د ښارګوټو لپاره ځمکې په نښه شوي، د ژوند چاپېریال ښهوالي په پار صنعتي ساحه د ښار سویل ختیځ ته انتقال شوې او همدا رنګه اداري او تعلیمي کمپلکس او مسلخ ته هم ځمکې په پام کې نیول شوي دي.
